Drejtori i Urgjencës Kombëtare Skënder Brataj ka kërkuar që të mos ushtrohet presion ndaj mjekëve dhe stafit të shëndetësisë, por të lejohen që të bëjnë punën të qetë.
“Çdo hallkë që shtohet është pjesë e shërbimit shëndetësor, ne nuk kemi të ndarë spitalet, 1, 2, 3, 4 apo qendra kombëtare, jemi të gjithë shërbimi shëndetësor i Shqipërisë. Në çdo hallkë do të jemi gati. Vetëm bashkëpunimi me njëri tjetrin, nuk ka rrugë tjetër, thjeshtë të la lënë të qetë të punojmë në këtë pandemi, jo nën presion, të punojmë për pacientët”, u shpreh Brataj në një dalje për mediat bashkë me ministren Shëndetësisë Ogerta Manastirliu.
Kjo e fundit bëri të ditur mbrëmjen e sotme hapjen e spitalit Covid-4.
“Në spitalin COVID4, me stafin mjekësor që nga sot do të shërbejë në strukturën e re të dedikuar për pacientët me covid19, si pjesë e planit tonë të menduar që në krye të herës, për të përballuar situatën e vjeshtë-dimrit. Forca ekipit të shëndetësisë në këtë sfidë aspak të lehtë. Me përkushtimin e stafeve mjekësore, me durim e solidaritet do ta fitojmë bashkë këtë luftë me armikun e padukshëm” , u shpreh Manastirliu.
