Presidenti turk, Recep Tayyip Erdogan zhvilloi sot një bisedë telefonike me kryeministrin kosovar, Albin Kurti dhe presidentin serb, Aleksandar Vuçiç ku diskutuan zhvillimet e fundit në Kosovë, sipas “Daily Sabah”.
“Presidenti turk, Erdoğan theksoi rëndësinë e dialogut, si e vetmja mënyrë për të lehtësuar paqen dhe stabilitetin e përhershëm në rajon”, thuhet në një deklaratë të Drejtorisë së Komunikimeve Presidenciale.
Ai gjithashtu vuri në dukje se Turqia është e gatshme të kontribuojë në procesin e dialogut për të shmangur përshkallëzimin e tensioneve mes dy vendeve.
Veriu i Kosovës i dominuar nga serbët është tronditur nga përleshjet mes protestuesve dhe forcave të sigurisë për zgjedhjen e kryebashkiakëve shqiptarë etnikë.
Më shumë se 53 civilë u plagosën nga bombat shokuese dhe gazi lotsjellës, ndërsa 30 paqeruajtës të NATO-s pësuan lëndime të shumta, duke përfshirë fraktura dhe djegie nga mjetet ndezëse shpërthyese të improvizuara.
