Në këto ditë të nxehta vere, kur temperaturat në qytet janë përvëluese, një vend i qetë dhe freskues është kthyer në destinacionin e preferuar të shumë vizitorëve: Oazi i Bushekut, në fshatin Shushicë të Elbasanit.
Vetëm 9.5 kilometra larg qendrës së qytetit të Elbasani, Bysheku ofron një mikroklimë të veçantë, burime të freskëta ujore dhe hije relaksuese nën rrapet shumë shekullorë, që e bëjnë këtë zonë ideale për shëtitje, piknik apo një ndalesë çlodhëse në natyrë.
Emri “Byshek” vjen nga turqishtja dhe do të thotë vend çlodhës apo vend argëtimi, emër që nuk është rastësor. Sipas rrëfimeve të banorëve, në këtë zonë ndaleshin dikur luftëtarët osmanë bashkë me kuajt e tyre, për të pushuar dhe rifituar energjitë gjatë kalimeve strategjike në luginën e lumit Shkumbin.
Sot, Bysheku është më i frekuentuar se kurrë. Fundjava dhe ditët e javës sjellin dhjetëra vizitorë, si nga Elbasani, ashtu edhe nga qytete të tjera e madje edhe nga jashtë vendit, të cilët mahniten nga natyra, qetësia dhe bukuritë autentike që ofron kjo pikë.
Bysheku është një hapësirë e pyllëzuar që spikat edhe për vlerat historiko-kulturore, ku duket se natyra ka bërë “pakt” me banorët për t’u dhuruar atyre, por jo vetëm, qetësi dhe një atmosferë ndryshe nga përditshmëria.
Ndersa Shushica është një fshat me rrënjë të thella historike dhe trashëgimi të pasur
Bysheku është vetëm një pjesë e pasurisë që ofron fshati i Shushicës, një zonë e njohur për mikpritjen tradicionale, harmoninë ndërfetare dhe historinë patriotike. Banorët vendas tregojnë me krenari se ky vend ka qenë skenë betejash të shumta, ku janë shkruar faqe të rëndësishme të qëndresës shqiptare.
Me kombinimin e natyrës së paprekur dhe historisë së gjallë, Shushica është destinacioni ideal për ata që kërkojnë diçka më shumë nga një udhëtim – një përjetim të plotë kulturor dhe shpirtëror.
Pse të vizitoni Byshekun dhe Shushicën?
Për të shijuar freskinë e burimeve natyrore në ditë të nxehta vere
Për të përjetuar një copëz historie të gjallë dhe rrëfime të trashëguara brez pas brezi
Për të ndjerë qetësinë dhe ngrohtësinë e një zone mikpritëse
Sepse Elbasani ka shumë më tepër për të ofruar përtej qytetit, dhe Shushica është një nga thesaret e tij më të çmuara
Nëse nuk e keni vizituar ende Byshekun, tani është koha ideale! Merrni me vete familjen, miqtë apo edhe vetëm aparatin fotografik, dhe zhyteni në një përvojë që do t’ju mbetet gjatë në mendje.
Elbasani nuk është vetëm qytet – është edhe natyrë, histori dhe jetë. Bysheku është dëshmia më e bukur për këtë.
