Ejiao, është një ilaç tradicional kinez i bërë nga xhelatina e nxjerrë nga lëkurat e gomarëve. Përdoret si tonik për gjakun dhe besohet se ka përfitime të ndryshme shëndetësore, duke përfshirë trajtimin e anemisë, ndalimin e gjakderdhjes dhe përmirësimin e sistemit imunitar. Kërkesa në rritje për ejiao ka çuar në një rritje të konsiderueshme të therjes së gomarëve, veçanërisht në vendet në zhvillim, duke ngritur shqetësime në lidhje me mirëqenien dhe qëndrueshmërinë e kafshëve.

Dikur rezervë ekskluzive e perandorëve në Kinë, ejiao tani është bërë e kërkuar dhe e konsumuar gjerësisht në mesin e klasës së mesme kineze. Përdoret për të përmirësuar qarkullimin e gjakut, për të ngadalësuar plakjen dhe për të rritur… libidon dhe pjellorinë. Është një produkt që është bërë një pjesë e rëndësishme e mjekësisë tradicionale kineze dhe tani ka një treg me vlerë mbi gjashtë miliardë dollarë. Kërkesa për “ejiao” është vazhdimisht në rritje, duke krijuar një cikël shpërthyes që prek jo vetëm Kinën, por edhe rajonet nga vijnë lëkurat e gomarëve.

Për të përmbushur këtë kërkesë në rritje, gati 5.9 milionë gomarë theren çdo vit në të gjithë botën dhe ky numër vlerësohet të arrijë në 6.8 milionë deri në vitin 2027. Kina, e cila dikur kishte një popullsi të madhe gomarësh, ka parë një rënie dramatike të numrit të tyre vitet e fundit.

Nga 11 milionë në vitin 1992, popullsia është zvogëluar në vetëm 1.5 milionë sot, bazuar në të dhënat deri në vitin 2023. Rezultati i kësaj rënieje është një zhvendosje drejt vendeve të tjera, kryesisht në Afrikë, për furnizimin me lëkurë.

Kërkesa për lëkurë ka shkaktuar një krizë të vërtetë tregtare, duke i shndërruar gomarët në objekte shfrytëzimi dhe duke zhdukur popullatat lokale. Aktivitetet e paligjshme po lulëzojnë, me rrjete vjedhjesh që veprojnë në shumë vende afrikane.

Gomarët shpesh vidhen dhe theren natën, pa pasoja penale për autorët, ndërsa komunitetet lokale preken seriozisht nga humbja e këtyre kafshëve, të cilat për shumë rajone janë një pjesë integrale e jetës së tyre të përditshme. Gratë dhe fëmijët preken veçanërisht, të cilët në Afrikë janë shpesh ata që marrin përsipër punën e lidhur me kujdesin për gomarët.

Situata është përkeqësuar nga rritja e vazhdueshme e kërkesës për “ejiao” në Kinë, e cila, siç theksojnë ekspertët, ka çuar në shfrytëzimin e grupeve më të cenueshme shoqërore dhe shkatërrimin e ekosistemeve që mbështeten te këto kafshë. Organizata britanike Donkey Sanctuary ankohet se rrjetet e paligjshme të tregtisë së lëkurës së gomarit vazhdojnë të lulëzojnë në shumë vende afrikane, pavarësisht përpjekjeve për të frenuar fenomenin.

Vlen të përmendet se, në vitin 2024, Bashkimi Afrikan vazhdoi të ndalonte tregtinë e lëkurës së gomarit në të gjithë kontinentin, me qëllim kufizimin e shfrytëzimit të gomarëve dhe mbrojtjen e komuniteteve lokale nga pasojat e kësaj industrie mizore. Megjithatë, pavarësisht ndalimit, rrjetet e paligjshme vazhdojnë të veprojnë të pakontrolluara, ndërsa qeveritë dhe organizatat lokale po shtojnë përpjekjet për të zbatuar ligjin dhe për të goditur këto praktika kriminale.

Kjo situatë tregon kërkesën e madhe për produktin dhe ndikimin që po ka në mirëqenien e gomarëve dhe komuniteteve lokale në Afrikë. Donkey Sanctuary thekson nevojën për një përpjekje të koordinuar ndërkombëtare për të frenuar shfrytëzimin e paligjshëm të gomarëve dhe për të mbrojtur këto kafshë nga komercializimi i trupave të tyre për prodhimin e ilaçeve tradicionale.

Top Channel