ATSH/ Për herë të parë mbërriti sot në Shqipëri Trofeu Origjinal i Kupës së Botës, një event i rëndësishëm për futbollin dhe për të gjithë sportdashësit shqiptar.
Trofeu i turneut “FIFA World Cup” nga Coca-Cola në Tiranë, do të ndalet në 51 vende dhe territore. Për herë të parë, turneu do të vizitojë të 32 vendet që u kualifikuan për “Kupën e Botës FIFA”, duke frymëzuar tifozët në mbarë botën.
Në ceremoninë e pritjes së Kupës së Botës në Shqipëri merrnin pjesë ministrja e Arsimit dhe Sportit, Evis Kushi, kryebashkiaku i Tiranës, Erion Veliaj dhe Luca Busi, Presidenti i Coca-Colas në Shqipëri.
Kushi u shpreh se, “futbolli është vërtetë sporti më i dashur, më popullor, një lojë që sa herë që luhet sjell emocionet më të fuqishme”.
“I uroj mirëseardhjen edhe të famshmit Gilberto Silva, fitues i këtij trofeu në 2002, i cili vjen në Shqipëri duke sjellë një copëz histori dhe nostalgji të futbollit të mrekullueshëm brazilian dhe botëror”, theksoi Kushi.
“Kupa e Botës, nuk është e artë vetëm nga floriri, por është e artë sepse ka brenda talent dhe pasion, përpjekje, shpirt gare dhe fantazi, lot dhe gëzim. Kjo kupë ka shëtitur në të gjithë rruzullin tokësor, në Amerikën Latine, Evropë, Azinë, dhe është ngritur lart nga futbollistë të mrekullueshëm, të talentuar që kanë frymëzuar miliona njerëz me lojën dhe golat e bukur”, tha Kushi.
“Miliona njerëz kanë ëndërruar të shikojnë ekipin e atdheut të tyre të fitojë ketë kupë magjike. Vërtetë duhet shumë punë, sakrificë, strategji, por edhe pak fat për të fituar këtë kupë. Pjesëmarrja në Kampionatin Europian “Francë 2016″ ishte një ëndërr që dukej e pamundur, por u bë realitet nga djemtë e mrekullueshëm të Kombëtares sonë. Ne jemi anëtarë në FIFA prej vitit 1932, kemi patur vazhdimisht mbështetjen e saj, dhe ëndrra jonë është të kualifikohemi në Kampionatin Botëror. Prandaj le të jetë një ogur i mirë prania e kësaj kupe magjike këtu në Tiranë dhe le të vazhdojmë ëndrrën!”, u shpreh Kushi.
Veliaj dha mesazhin se sporti i bashkon njerëzit dhe se të gjithë duhet të mësojnë nga loja në skuadër.
“Jam i lumtur që mikpresim në Tiranë Kupën e Botës. E paprekshme për të gjithë ne tokësorët, por e prekshme nga ata që janë triumfues. Ashtu si Silvio Gaxaniga, skulptori i famshëm italian, që jo vetëm krijoi Kupën e Botës, por edhe Kupën e UEFA-s, pastaj Superkupën. Një artist italian, i cili kur po fantazonte se çfarë mund të ishte trofeu dinjitoz për ata që janë më të mirët e botës, konceptoi sportistët që mbajnë botën në krahët e tyre, triumfin e sportit, e lojës në skuadër, të punuarit në ekip dhe të atyre që përpiqen, rrëzohen dhe ngrihen prapë. Kjo simbolikë e madhe që quhet Kupa e Botës, është sot në Tiranë. Është një prej 1000 aktiviteteve që Tirana mikpret, si Kryeqyteti Evropian i Rinisë”, u shpreh Veliaj.
Kryebashkiaku tregoi se gjatë një bisede me Gilberto Silva-n, ish-futbollistin i Brazilit, tashmë Ambasador i Turneut të Trofeut të “FIFA World Cup”, kuptoi se sa e rëndësishme është që, për të qenë një sportist i mirë, duhet të jesh fillimisht një njeri i mirë.
“Duke u fokusuar vetëm te trofeu apo rezultati i garës, harrojmë që mbi të gjitha, përveç se të jesh sportist i mirë, duhet të jesh njeri i mirë. Unë besoj se kemi ambicie për të pasur sportin elitar, por mbi të gjitha kemi një ambicie për të pasur sportin komunitar. Nëpërmjet sportit ne kemi qytetarë të mirë. Një fëmijë mund të mësojë teorinë në shkollë, por siç mëson në një skuadër që jeta ka edhe humbje, edhe fitore, dhe këtë loj karakteri që e krijon një qytetar të mirë e sjell vetëm sporti. Sporti i bashkon njerëzit, është një hapësirë demokratike që na mëson karakter dhe me shpresë do frymëzohemi edhe ne që merremi me politikëbërje, që këtë praktikë të mirë që kemi filluar në Tiranë me terrenet sportive dhe palestrat e hapura, ta shtrijmë në gjithë vendin”, nënvizoi Veliaj.
Ambasadori i Turneut të Trofeut të “FIFA World Cup”, Gilberto Silva tha se ai është këtu për të mbështetur dhe për t’u dhënë shpresë të rinjve që endërrat e tyre mund të bëhen realitet.
“Uroj që kjo ndalesë këtu me trofeun, me të gjithë kohën që do të kemi këtu, shpresoj t’ju frymëzojë të gjithëve, gjeneratat e ardhshme në sport, në jetë, për t’i bërë ëndrrat e tyre realitet. Ne këtu jemi për t’ju mbështetur, për të dhënë më të mirën tonë për ju, me zemrën tonë, me shpirtin tonë, dhe shpresoj të gjithë ta shijoni sepse edhe ne do ta shijojmë shumë çdo minutë këtu”, tha ish-futbollisti Gilberto Silva.
Ndërsa, Luca Busi, Presidenti i Coca-Colas në Shqipëri, falenderoi kryebashkiakun Veliaj për mikpritjen e Kupës së Botës në Tiranë.
“Faleminderit zonjës ministre dhe kryebashkiakut të Tiranës që na mirëpriti në këtë ditë të sotme, për Kupën e Botës, origjinalen, dhe për të festuar këtë pasion të madh. Ne operojmë në Shqipëri prej 28 vitesh dhe tashmë ajo është kthyer shtëpia jonë. Unë u emocionova, kur skuadra kombëtare shqiptare mori pjesë në Evropianin e 2016-ës. Duke parë gjithë këta tifozë, gjithë këto shqiponja, që festojnë në tribunë, unë shpresoj që në edicionin tjetër të Kupës së Botës të realizohet ëndrra që Shqipëria të kualifikohet”, përfundoi Busi.
Turneu i Trofeut të FIFA World Cup nga Coca-Cola 2022 filloi me eventin e parë në Dubai, ku ish-fituesit e Kupës së Botës FIFA, Iker Casillas dhe Kaká u mblodhën së bashku për të dërguar Trofeun origjinal të Kupës së Botës FIFA në udhëtimin e tij rreth botë përpara kampionatit botëror. Duke filluar nga sot, Coca-Cola fton komunitetin vendas të futbollit për të parë simbolin më të njohur në futboll dhe për të përjetuar magjinë e vërtetë të ngjarjes më të madhe dhe më të pritur të një sporti në botë – FIFA World Cup.
