ATSH/ Strukturat e Emergjencave Civile, pjesë e Forcave të Armatosura do të jenë shumë herë më të mirëpajisura dhe më dinjitoze në përballimin e fatkeqësive natyrore.
Kryeministri Edi Rama në një video të pblikuar sot solli pamje nga puna e kryer nga emergjencat civile.
“Sot, falë reformës së emergjencave civile dhe investimeve për to, Forcat e Armatosura shqiptare, kanë një flotë të re dhe janë të pajisura me logjistikë e kapacitete të reja për përballimin e emergjencave, duke garantuar standarde e gatishmëri si kurrë më parë”, – tha Rama.
Ndërsa ministrja e Mbrojtjes Olta Xhaçka, gjatë ceremonisë së prezantimit të uniformave dhe mjeteve të reja të strukturave të emergjencave civile, vlerësoi bashkëpunimin me aleatin e NATO, Turqinë në kuadër të emergjencave civile.
Duke përmendur investimet e viteve të fundit në Forcat e Armatosura, ministrja Xhaçka theksoi vëmendjen që i është dhënë modernizimit dhe riorganizimit të strukturave të EC.
“Të gjithë jemi dëshmitarë sesa janë shtuar sfidat prej fatkeqësive natyrore. Ligji i ri “Për Mbrojtjen Civile” e vendos theksin tek parandalimi i fatkeqësive dhe ndan përgjegjësi të qarta për pushtetin vendor, siç është përcaktimi 4% i buxhetit vjetor të bashkive për emergjencat, dhe mbi të gjitha krijoi Agjencinë Kombëtare të Mbrojtjes Civile (AKMC). Pra, nga drejtoria me 7 veta, kemi sot një Agjenci me 120 persona që bën menaxhimin koordinimin dhe trajnimin e strukturave të specializuara për emergjencat civile”, u shpreh ministrja Xhaçka, e cila njoftoi pajisjen e mëtejshme të Emergjencave Civile.
Ministrja Xhaçka u shpreh se “nuk ka sot dëshmi më të qartë të profesionalizmit e nivelit të organizimit që kanë arritur sot Forcat e Armatosura sesa aftësia që ato kanë treguar për të përballuar të papriturat që na ka rezervuar natyra. Unë jam krenare për punën e çdo burri e çdo gruaje në uniformë që e ka bërë të mundur këtë performancë kaq të mirë. Jam krenare që falë punës së tyre, por edhe falë mbështetjes së miqve e partnerëve e të vetë kryeministrit që ka qenë nga mbështetësit kryesorë të transformimit të emergjencave civile, qytetarët shqiptarë mund të jenë sot të sigurt që pavarësisht emergjencës apo fatkeqësisë, ata nuk do të jenë kurrë vetëm në momentin e tyre të nevojës”.
Ambasadori i Turqisë në vendin tonë Murat Ahmet Yörük, vlerësoi marrëdhëniet mes dy popujve dhe nënvizoi se vlera e mjeteve, pajisjeve dhe uniformave të reja të dhuruara nga qeveria turke arrin në 1.5 milionë dollarë ameriknaë.
Pjesa e parë e grantit të qeverisë turk përbëhet nga 6 autoambulanca të reja, të pajisura me të gjitha aparaturat dhe mjetet e nevojshme, mbi 1 300 uniforma për operacionet e kërkim shpëtimit në raste përmbytjesh, tërmetesh apo të shuarjes së zjarreve./k.s/
