Një sukses i jashtëzakonshëm vjen nga qyteti i Cërrikut, duke e vendosur atë në qendër të vëmendjes ndërkombëtare për ekselencë akademike. Nxënësi i klasës së 9-të, Loris Qosja, është shpallur fitues i vendit të parë në botë në Olimpiadën Ndërkombëtare të Matematikës, duke u vlerësuar me Medalje Ari. Përveç këtij triumfi, Loris Qosja ka arritur edhe një tjetër rezultat të rëndësishëm, duke fituar vendin e tretë në Olimpiadën e Kimisë, çka i ka siguruar Medalje Bronzi dhe e ka bërë një nga nxënësit më të suksesshëm të kësaj gare ndërkombëtare. Këto arritje janë regjistruar në kuadër të Olimpiadës Botërore “Neo Science”, e cila u mbajt në Orlando, Shtetet e Bashkuara të Amerikës, nga data 9 deri më 16 janar 2026, ku morën pjesë nxënës të talentuar nga vende të ndryshme të botës. Suksesi i Loris Qosjes përbën një burim krenarie për familjen e tij, institucionin arsimor që përfaqëson, qytetin e Cërrikut dhe për gjithë Shqipërinë, duke dëshmuar potencialin e lartë të të rinjve shqiptarë në fushat shkencore.