Ashtu si çdo vit në sezon, kur kurba e udhëtarëve dhe automjeteve që mbërrijnë nga shteti fqinj rritet, autoritetet portuale shtojnë lëvizjet e trageteve në dy brigjet e Adriatikut dhe rrisin kapacitetet përpunuese për të shmangur vonesat. Nga kjo fundjavë dhe në vazhdim në portin e Durrësit kanë nisur lundrimet e dyfishta të trageteve në linjën Durrës-Bari-Durrës, lundrime të përditshme në linjën e Ankonës, si dhe shtim të sporteleve të policisë kufitare dhe doganës për përpunimin e pasagjerëve dhe automjeteve.

Të shtunën veçanërisht pritet që një fluks i lartë udhëtarësh të mbërrijë në portin e Durrësit, kryesisht shtetas të Kosovës që jetojnë dhe punojnë në Evropë dhe kthehen për pushime në Kosovë dhe Shqipëri. Nuk mungojnë as turistët e huaj që zgjedhin transportin detar për të mbërritur në vendin tonë. Sipas Kapitenerisë së Portit Durrës, javën e fundit kanë mbërritur në këtë vendkalim kufitar rreth 15 mijë persona

Sipas kapitenit të portit të Durrësit Taulant Allka, edhe këtë sezon janë marrë të gjitha masat për të siguruar një përpunim të shpejtë dhe pa vonesa për ata që mbërrijnë në vendin tonë, ndërkohë fillimi i muajit gusht dhe mesi i tij (Ferragosto) do të sjellë dhe më shumë fluks në port, pasi mijëra anëtarë të diasporës shqiptare në vendet e Bashkimit Europian marrin pushimet dhe kthehen pranë familjeve dhe të afërmve të tyre

Top Channel