Në një ceremoni solemne Elbasani përkujtoi një ngjarje të rëndësishmë të historisë kombëtare, siç është Kongresi i Elbasanit i mbajtur 111 vite më parë. Ky kongres hodhi bazat e arsimit shqip dhe ishte dallëndyshja e parë në çeljen e shkollave shqipe në mbarë trojet shqiptare. Në ceremoninë e organizuar morën pjesë Kryetari i Grupit Parlamentar të PS, Taulant Balla, Kryetari i Bashkisë Gledian Llatja, historianë, mësues, veteranë dhe dashamirës të arsimit shqip. Teksa lartësoi vlerat e Kongresit Balla tha se këtë vit shkollat do të nisin me sfidën e madhe të ruajtjes së shëndetit të fëmijëve, mësuesve, por edhe familjeve të tyre. Por, sipas Ballës, hapja e shkollave është domosdoshmëri dhe menaxhimi që bashkitë, në bashkëpunim me strukturat e tjera të kujdesit shëndetësor, po i bëjnë situatës, është për t’u vlerësuar. Ceremonia u përshëndet nga Kryetari i Bashkisë Z. Llatja, historianë dhe të pranishëm të tjerë të cilët vlerësuan kujtimin e këtyre datave madhore të historisë së arsimit shqip. Kongresi i Elbasanit mbylli punimet në 9 shtator të vitit 1909 me këto vendime të rëndësishme: 1. Çelja e shkollave të reja shqipe. 2. Çelja e një shkolle normal që do të përgatiste mësues për të gjitha trevat shqipfolëse. 3. Hartimi i një program strukturor, buxhetor dhe organizativ të arsimit shqiptar. 4. U zgjodh dialekti elbasanas si modeli i shqipes së shkruar etj.
