Ngjarja e rëndë ka ndodhur rreth orës 01:30 të mëngjesit me orën lokale (00:30 GMT) në bodrumin e “Le Constellation”, një lokal i njohur që ndodhet në qendër të qytetit alpin të Crans-Montana.

Sipas raportimeve, flakët u përhapën me shpejtësi në të gjithë ambientin, duke e përfshirë lokalin në një zjarr të fuqishëm që u kthye në tragjedi për dhjetëra persona që ndodheshin brenda. Pamjet dhe dëshmitë flasin për skena kaosi, ndërsa shumë klientë mbetën të bllokuar nga zjarri që shpërtheu në bodrum.

Mësohet se pronarët e klubit të natës janë një çift francez, të njohur në industrinë zvicerane të mikpritjes: Jacques Moretti, 49 vjeç, dhe bashkëshortja e tij Jessica, 40 vjeçe, me origjinë nga ishulli francez i Korsikës. Tani ata po përballen me një sërë pyetjesh se si flakët u përhapën kaq shpejt dhe si lokali u shndërrua në një kurth vdekjeprurës për klientët.

Nga profili në Facebook i znj. Moretti, mësohet se ajo ka lidhje edhe me Mbretërinë e Bashkuar, pasi ka studiuar në Universitetin e Glamorgan në Uells, si dhe në Universitetin Ndërkombëtar të Monakos dhe Shkollën e Biznesit Montpellier në Francë.

Çifti, i cili ka edhe një djalë të vogël, e hapi barin “Le Constellation” në dhjetor të vitit 2015, pasi ishin dashuruar me zonën gjatë një vizite pushimi njëjavore në vitin 2011.

Lokali, i cili përfshinte një tarracë në katin e sipërm dhe një klub nate në bodrum, me DJ dhe muzikë live, ishte shndërruar në një nga destinacionet më të njohura të jetës së natës në Crans-Montana. Klientela përbëhej kryesisht nga të rinj të apasionuar pas sporteve dimërore, si dhe vendas.

Në faqen zyrtare të Crans-Montana, lokali përshkruhej si një “hapësirë elegante” me një “atmosferë festive”, ndërsa online cilësohej shpesh si “vendi ideal” për argëtim, i frekuentuar nga një publik ndërkombëtar.

Mësohet gjithashtu se lokali ishte një nga të paktët në resortin e skive që lejoi hyrjen e personave mbi 16 vjeç, ndryshe nga shumica e ambienteve të tjera ku mosha minimale ishte 18 vjeç.

Autoritetet zvicerane kanë nisur një hetim të plotë për rrethanat e ngjarjes dhe arsyet pse zjarri u përhap kaq shpejt, duke shkaktuar një prej tragjedive më të mëdha të viteve të fundit në këtë zonë turistike të njohur.

Top Channel