Dy persona kanë humbur jetën në orët e para të mëngjesit të kësaj të marte në qytetin e Durrësit. Burime për Report Tv, bëhet fjalë për një shtetas sirian dhe një 70-vjeçe, në dy ngjarje që nuk kanë lidhje me njëra- tjetrën.
Mësohet se shtetasi sirian, rreth moshës 20-vjeç i seksit mashkull është gjetur i pajetë në rrethana ende të paqarta. Identiteti i tij nuk dihet ende, teksa mësohet se është gjetur i pajetë në lagjen nr.1 në Durrës, pranë Torrës Veneziane. Gazetari i Report Tv, Artur Korriku raporton se siriani ka trauma masive në trup dhe dyshimet janë se është përplasur nga një automjet dhe është lënë në rrugë nga autorë e kësaj ngjarjeje. Grupi hetimor e përjashton mundësinë e vrasjes për shkak të plagëve që kanë marrë.”Grupi hetimor ndodhet në vendngjarje dhe po punon për zbardhjen e ngjarjes”, njofton policia.
Ndërkohë, në lagjen numër 10 të qytetit bregdetar, një banesë është përfshirë nga flakët e për pasojë ka humbur jetën 70-vjeçarja e identifikuar si D.K,. Zjarri ka rënë rreth orës 05:00 në katin e dytë të një pallati. E moshuara jetonte e vetme duke e bërë të pamundur që ajo të shpëtonte nga flakët. Nuk dihen ende shkaqet e zjarrit, por mendohet se bëhet fjalë për një shkëndijë elektrike.
/Shqiptarja.com
