AMSTERDAM, 9 qershor /ATSH-DPA/ – Kompania farmaceutike amerikane “Gilead” ka kërkuar zyrtarisht autorizim me kusht për ilaçin remdesivir si një agjent antiCOVID-19 në tregun europian, njoftoi Agjencia Europiane e Barnave (EMA).
“Vlerësimi i përfitimeve dhe rreziqeve të remdesivir po kryhet nën një afat kohor të reduktuar dhe brenda disa javësh mund të jepet një opinion, në varësi të qëndrueshmërisë së të dhënave të paraqitura dhe nëse informacioni i mëtejshëm kërkohet për të mbështetur vlerësimin”, deklaroi EMA.
Ky do të ishte miratimi i parë i një ilaçi për të trajtuar COVID-19 në Europë.
Më 30 prill agjencia kishte filluar një procedurë të përshpejtuar të aprovimit të remdesivir dhe vlerësoi të dhënat nga studimet. Cikli i parë përfundoi më 15 maj.
Në fund të majit, EMA njoftoi se vendimi për miratim do të vonohej. Së pari, prodhuesit duhej të paraqisnin zyrtarisht kërkesën.
ATSH
