Kjo ditë shënon një moment të rëndësishëm në përpjekjet për të ruajtur, promovuar dhe për t’i dhënë përparësi lojës, si një mënyrë që të gjithë njerëzit, por veçanërisht fëmijët, të mund të lulëzojnë në potencialin e tyre të plotë.
Përtej argëtimit, loja është një gjuhë universale e folur nga njerëz të të gjitha moshave, duke tejkaluar kufijtë kombëtarë, kulturorë dhe socio-ekonomikë. Ky pasion i përbashkët nxit një ndjenjë komuniteti dhe krenarie kombëtare.
Drejtoresha e përgjithshme e UNICEF-it, Catherine Russell u shpreh se, “loja është një shenjë që tregon se fëmijët ndihen të sigurt, kanë marrë ushqim dhe dashuri. Ata ndiejnë se mund të jenë fëmijë edhe në mes të vështirësive të mëdha”.
Loja nxit qëndrueshmërinë, kreativitetin dhe inovacionin tek individët. Për fëmijët në veçanti, loja ndihmon në ndërtimin e marrëdhënieve dhe përmirëson kontrollin, kapërcimin e traumave dhe zgjidhjen e problemeve. Ajo i ndihmon fëmijët të zhvillojnë aftësitë njohëse, fizike, krijuese, sociale dhe emocionale që u nevojiten për të lulëzuar në një botë që ndryshon me shpejtësi.
Nga ana tjetër, kufizimi i mundësive për lojë pengon drejtpërdrejt mirëqenien dhe zhvillimin e një fëmije. Në mjediset arsimore, të mësuarit e bazuar në lojë është njohur si një qasje efektive për të angazhuar nxënësit në mënyrë aktive në procesin e të mësuarit. Ai ndihmon që të mësuarit të jetë më i këndshëm dhe i rëndësishëm, duke rritur kështu motivimin dhe mbajtjen mend të informacionit.
OKB thekson rolin pozitiv të lojës në promovimin e tolerancës, qëndrueshmërisë dhe lehtësimin e përfshirjes sociale, parandalimin e konflikteve dhe ndërtimin e paqes. Në njohje të kësaj, Konventa e Kombeve të Bashkuara për të Drejtat e Fëmijëve e ka sanksionuar lojën si një të drejtë themelore të çdo fëmije, sipas Nenit 31.
/r.e/
