Gjatë inspektimit, ministri Salla bëri të ditur se në kuadër të investimeve të reja të mbështetura nga Banka Botërore, Qafë Thana do të pajiset me infrastrukturë moderne magazinimi dhe ambiente të dedikuara për kontrollin dhe monitorimin e eksporteve dhe importeve.

“Po investojmë në pikat kufitare për magazinim të plotë dhe për krijimin e kushteve që Autoriteti Kombëtar i Ushqimit të monitorojë në mënyrë të plotë eksportet dhe importet. Analizat që lidhen me sigurinë ushqimore do të kryhen këtu, duke shmangur vonesat e panevojshme dhe duke garantuar më shumë siguri për qytetarët,” u shpreh ministri Salla.

Ai theksoi se investimi do të shërbejë jo vetëm për AKU-në, por edhe për Doganat, duke krijuar kapacitetet e nevojshme për magazinimin dhe kontrollin e produkteve që kalojnë përmes pikës kufitare.

“Është shumë e rëndësishme që të kontrollojmë çdo produkt që hyn në Shqipëri, në mënyrë që qytetarët të kenë garanci se produktet që konsumojnë përmbushin standardet e sigurisë ushqimore. Synimi ynë është që këto investime të shtrihen në të gjitha pikat doganore sipas standardeve europiane,” deklaroi Salla.

Ministri i Bujqësisë bëri të ditur gjithashtu se do të ndërtohen shtatë laboratorë të rinj në të gjithë territorin e vendit, duke zëvendësuar laboratorët ekzistues dhe duke rritur kapacitetet për analizat e importeve dhe eksporteve.

“Pikat kufitare do të kenë investime të posaçme për garantimin e sigurisë ushqimore në import dhe eksport. Përmes laboratorëve dhe analizave në kohë reale, do të garantojmë cilësinë e produkteve që hyjnë dhe dalin nga Shqipëria, si drejt vendeve fqinje, ashtu edhe drejt tregut europian,” tha ai.

Nga ana e tij, ministri i Punëve të Brendshme, Besfort Lamallari, theksoi rëndësinë e bashkëpunimit ndërinstitucional për garantimin e sigurisë ushqimore dhe lehtësimin e lëvizjes së mallrave dhe qytetarëve.

“Po ndjekim, në bashkëpunim me Ministrinë e Jashtme, përmbylljen sa më të shpejtë të marrëveshjes me palën maqedonase, për të përfituar nga lehtësimi i procedurave dhe kalimi më i shpejtë i pasagjerëve dhe mallrave, pa cenuar sigurinë. Qafë Thana është pika më e madhe kufitare mes dy vendeve tona dhe kërkon koordinim të plotë mes të gjitha institucioneve,” u shpreh Lamallari.

Ai nënvizoi se Policia e Shtetit, Doganat dhe Autoriteti Kombëtar i Ushqimit duhet të veprojnë si një mekanizëm i vetëm për të parandaluar kontrabandën, evazionin fiskal dhe hyrjen e produkteve të falsifikuara apo të pasigurta në treg.

“Garantimi i cilësisë së ushqimeve sipas standardeve më të mira është një mision i përbashkët. Bashkëpunimi mes institucioneve është thelbësor për të mbrojtur konsumatorët shqiptarë dhe për të siguruar që produktet që eksportohen nga Shqipëria të përmbushin kriteret dhe standardet e kërkuara ndërkombëtarisht,” deklaroi ministri Lamallari.

Inspektimi në PIK Qafë Thanë u fokusua në forcimin e mekanizmave të kontrollit, modernizimin e infrastrukturës së inspektimit kufitar dhe garantimin e standardeve europiane të sigurisë ushqimore, në funksion të mbrojtjes së konsumatorëve dhe rritjes së besueshmërisë së produkteve shqiptare në tregjet rajonale dhe europiane.