“Fjala licencim fatkeqësisht na kujton edhe prapësi, sekserë, muhabete te kafja e institucionit, rryshfete, stres për atë që do aplikojë, padrejtësi, vonesa, angari, lojra në kurriz të konkurrencës. Ndaj DPSHTRR, pavarësisht vullnetit, suksesit në thjeshtim procedurash e 0 ankesave për vitet 2019-21 mbi praktikat e administruara nga ky ent, ka investuar për një qasje krejt të re me sektorin e certifikim/licencimit të linjave ndërqytetëse, përmes një sistemi të ri operativ e informatik si Platforma Kombëtare e-Transport, që brenda muajit Shkurt del me 8 shërbimet e para online në e-Albania, në ndihmë të operatorëve të sektorit”, thuhet në njoftimin e DPSHTRR-së.

Prej dy vitesh, DPSHTRR po punon për rikonceptimin e plotë të të gjithë administrimit të sektorit të transportit publik rrugor të udhëtarëve me rrjetin e linjave ndërqytetëse.

“Kjo synon zgjidhjen me transparencë dhe në mënyrë gjithëpërfshirëse e të qendrueshme të plagëve shumëvjeçare të këtij sektori në lëngim, si dhe t’i japë fund diskriminimit, allishverisheve, arrnimeve, muzës politike e abuzimit. Me qëllim kryesor formalizimin e tregut, uljen e kostove për operatorët, maksimizimin e rrjetit, mbështetjen për subjektet, mundësimin e incentivave dhe politikave ndihmëse, sigurinë e cilësinë për pasagjerin, fuqizimin e transfertave ndërqytetëse me transport publik rrugor dhe aksesin optimal të qytetarit tek bileta”, thuhet në njoftim.

Lancimi i e-Transport për publikun, sipas DPSHTRR-së, “do të kryhet me kompletimin e fazës së biletimit elektronik dhe pas popullimit të sistemit me tërë prapavijën financiare të integruar me subjektet”.