Kallas e bëri deklaratën këtë të diel në Konferencën e Sigurisë në Mynih, një ditë pasi sekretari amerikan i Shtetit, Marco Rubio, dha një mesazh qetësues për aleatët evropianë.
Kallas gjatë fjalimit të saj iu referua kritikave në strategjinë e sigurisë kombëtare të SHBA-së, të publikuar në dhjetor.
Në dokument thuhej se Europa po dobësohet nga politikat e saj të emigracionit, rënia e normave të lindshmërisë, “censura e lirisë së shprehjes dhe shtypja e opozitës politike”, si dhe nga “humbja e identiteteve kombëtare dhe e vetëbesimit”.
“Në kundërshtim me atë që mund të thonë disa, Europa është e zgjuar dhe nuk po përballet me zhdukje qytetërimi. Në fakt, njerëzit ende duan t’i bashkohen Unionit dhe nuk e kam fjalën për vetëm evropianët e tjerë. Gjatë një vizite në Kanada vitin e kaluar shumë njerëz atje kishin interes për t’iu bashkuar BE-së”- tha Kallas.
Në fjalimin e tij në Mynih, Sekretari i Shtetit, Marko Rubio gjithsesi i zbuti tonet.
“Fundi i epokës transatlantike nuk është as qëllimi ynë dhe as dëshira jonë. Shtëpia jonë mund të jetë në hemisferën perëndimore, por ne gjithmonë do të jemi fëmijë të Evropës”.
Ai e bëri të qartë se administrata Trump do të qëndrojë e palëkundur në çështje si migracioni, tregtia dhe klima.
Top Channel
