Situata është veçanërisht e rëndë në Serbi, Bosnje e Hercegovinë, Spanjë dhe Poloni, ku ekipet e emergjencave po luftojnë njëkohësisht me zjarret, reshjet intensive dhe ndërprerjet e energjisë.

Në Serbi, një zjarr i madh ka përfshirë më shumë se 1 600 hektarë bimësi në rezervatin natyror Deliblatska Pescara, rreth 60 kilometra në lindje të Beogradit.

Bashkimi Evropian ka dërguar helikopterë dhe zjarrfikës për të ndihmuar autoritetet serbe, ndërsa në operacion janë angazhuar edhe avionë dhe helikopterë të ushtrisë serbe.

Sipas ministrit të Brendshëm, Ivica Dacic, situata mbetet shumë e vështirë dhe rreth 400 persona punojnë çdo ditë në terren.

Në Bosnje e Hercegovinë, një tjetër zjarr i madh shpërtheu pranë kufirit me Kroacinë, duke detyruar autoritetet të mbyllin një nga rrugët kryesore që lidh Trebinjen me Dubrovnikun.

Disa fshatra pranë Ivanicës u evakuuan pasi flakët iu afruan banesave.

Zjarrfikës nga Kroacia iu bashkuan ekipeve boshnjake, ndërsa temperaturat e larta, erërat dhe mungesa e reshjeve prej muajsh po e vështirësojnë ndjeshëm situatën.

Në Spanjë, moti ekstrem ka marrë forma të ndryshme.

Në Tarragona, reshjet e dendura shkaktuan përmbytje, plagosën 11 persona dhe ndërprenë qarkullimin rrugor dhe hekurudhor. Në disa zona ranë më shumë se 145 milimetra shi, ndërsa meteorologët paralajmëruan për stuhi të tjera të fuqishme në lindje dhe verilindje të vendit.

Ndërkohë, në rajonin e Valencias zjarrfikësit po luftojnë me një zjarr të shkaktuar nga rrufeja.

Zjarri pranë Segorbes u përhap me shpejtësi pas ndryshimit të drejtimit të erës, duke detyruar më shumë se 1 000 banorë të Gatovës të evakuohen.

Flakët dogjën rreth 630 hektarë, përpara se ekipet tokësore dhe mjetet ajrore të arrinin ta stabilizonin situatën.

Kjo ndodhi vetëm pak ditë pasi temperaturat në Spanjë arritën deri në 44 gradë Celcius.

Në Poloni, stuhitë kanë shkaktuar më shumë se 6 500 ndërhyrje të shërbimeve zjarrfikëse që nga e premtja.

Dymbëdhjetë kampe verore u evakuuan si masë paraprake për shkak të përmbytjeve dhe ndërprerjeve të energjisë.

Autoritetet paralajmëruan për stuhi të tjera në veri të vendit, me reshje deri në 30 litra për metër katror, erëra deri në 70 kilometra në orë dhe mundësi për breshër.

Megjithëse në disa zona situata po përmirësohet, vala e motit ekstrem tregon kontrastin gjithnjë e më të madh të kushteve atmosferike në Evropë, periudha të gjata nxehtësie dhe thatësire që favorizojnë zjarret, të pasuara nga reshje të rrëmbyeshme dhe stuhi që mund të shkaktojnë përmbytje. /Ad.Ab./