ATSH-ANSA/ – Pas një periudhe kur infeksionet e koronavirusit pothuajse u zeruan në Izrael, më shumë se 100 infeksione të reja u raportuan në 24 orë për herë të parë pas dy muajsh.
”Rreth 125 persona testuan pozitivisht’’, deklaroi Ministria izraelite e Shëndetësisë në një postim.
Drejtori i Përgjithshëm i Ministrisë së Shëndetësisë, Chezy Levy, i tha televizionit izraelit se rreth 70% e infeksioneve të reja përfshinin variantin Delta.
Varianti Delta u zbulua për herë të parë në Indi dhe konsiderohet veçanërisht ngjitës.
”Gjysma e të infektuarve ishin fëmijë dhe një e treta e të infektuarve ishin vaksinuar’’, theksoi ai.
Kohët e fundit në mes të qershorit, infeksionet e reja të përditshme në Izrael ishin vetëm njëshifrore.
Javën e kaluar, kërkesa për të mbajtur maska për fytyrën u hoq në të gjithë vendin.
Për shkak të numrit në rritje të infeksioneve dhe përhapjes së variantit Delta, autoritetet rekomandojnë vaksinimin e të rinjve të moshës 12 deri në 15 vjeç. /os/
