Në atë kohë, SIDA ishte ende e mbuluar me mister dhe paragjykime kundër LGBTQ+. Sot, pas dekadash aktivizmi dhe kërkimi, SIDA nuk është dënimi me vdekje që dukej 40 vjet më parë. Njerëzit me HIV mund të jetojnë jetë të plotë, por lufta nuk ka mbaruar. Kjo është arsyeja pse ne kemi nevojë për Ditën Botërore të SIDA-s, për të na kujtuar se, megjithëse gjërat janë më të mira, një kurë ende nuk është gjetur.

Pak ditë më parë këngëtari me famë botërore Elton John, u bëri thirrje ministrave të marrin masa për eliminimin e rasteve të reja të HIV-it në Britaninë e Madhe. Kjo vjen pasi më shumë se 580 raste të padiagnostikuara më parë janë identifikuar nga një skemë e re testimi pioniere.

Sipas skemës, kushdo që ka një analizë gjaku në njësitë e përzgjedhura të spitalit A&E në Londër, është testuar gjithashtu për HIV, Hepatitin B dhe Hepatitin C. Projekti pilot i “testimit” ka identifikuar më shumë se 3,500 raste të tre infeksioneve të transmetuara nga gjaku që nga prilli 2022, duke përfshirë më shumë se 580 raste me HIV. Një zëdhënës i Departamentit të Shëndetësisë tha se qeveria britanike është e përkushtuar për t’i dhënë fund transmetimeve të reja të HIV brenda Anglisë deri në vitin 2030-të.

Në Shqipëri, sipas të dhënave të Institutit të Shëndetit Publik, vendi ynë është me incidencë të ulët të përhapjes së këtij infeksioni. Numri i rasteve të reja të diagnostikuar në vitin 2023 është 113. Ashtu si dhe në vitet e mëparshme, më shumë meshkuj se femra u diagnostikuan me HIV në vitin 2023, respektivisht 87 dhe 26.

Në vendin tonë janë 15 qendra ku kryhet testi HIV, me një shpërndarje në të gjithë vendin. Testimi për HIV është i disponueshëm në qendrat e këshillimit dhe testimit vullnetar (QKTV), Klinikën Ambulatore në Qendrën Spitalore Universitare të Tiranës, Laboratorin e Mikrobiologjisë në Qendrën Spitalore Universitare Tiranë, SUSM “Shefqet Ndroqi”, SUOGJ “Mbretëresha Geraldinë” dhe “Koco Gliozheni”, Spitalet Rajonale, laboratorët/klinika/spitale dhe në Institutin e Shëndetit Publik (ISHP).

Top Channel