ATSH/- Policia e Durrësit ka gjobitur të dielën në mbrëmje një administrator lokali në Fushë Krujë, i cili në mjediset e lokalit të tij lejoi zhvillimin e një dasme.
Policia e Durrësit në njoftimin e saj, të hënën në mëngjes, bëri të ditur se po ashtu janë prangosur edhe dy drejtues automjeti të cilët janë kapur në shkelje të rëndë të kodit të qarkullimit rrugor.
Në njoftimin e Policisë së Durrësit, sqarohet se “shërbimet e Policisë në Komisariatin e Policisë Krujë, në vijim të kontrolleve të ushtruara në subjekte të ndryshme, me qëllim parandalimin e përhapjes së COVID-19, kanë evidentuar në Fushë Krujë, një lokal që kishte organizuar dasmë në kundërshtim me Aktin Normativ, duke mos respektuar distancën e sigurisë midis personave. Për këtë subjekt me administrator shtetasin I. T., shërbimet e Policisë kanë vendosur masën administrative 1.000.000 lekë”.
Po ashtu në njoftim bëhet me dije se specialistët për Hetimin e Trafikut të Paligjshëm dhe Narkotikëve arrestuan në flagrancë shtetasin B. A., 59 vjeç, sepse pas një konflikti familjar kanë shkuar në banesën e tij dhe gjatë kontrollit të ushtruar kanë gjetur dhe sekuestruar në cilësinë e provës materiale 84 gr. doza me lëndë narkotike të dyshuar canabis sativa.
Lidhur me sigurinë rrugore, specialistët e Qarkullimit Rrugor në Drejtorinë Vendore të Policisë Durrës arrestuan në flagrancë shtetasit F. Ç., 30 vjeç dhe A. G., 57 vjeç, banues në Durrës, pasi shtetasi F. Ç., duke drejtuar motoçikletën tip “Piaggio” pa targa dhe në gjendje të dehur është përplasur me motoçikletën tip “Papaq” pa targa dhe pa leje drejtimi, me drejtues shtetasin A. G. Materialet i kaluan Prokurorisë së Rrethit Durrës, për veprime të mëtejshme. /a.g/
