ATSH-DPA/ – Botërori 2026 ka hyrë në histori si edicioni më i shpejtë që ka arritur shifrën e 100 golave që nga viti 1958.Goli i sulmuesit holandez Cody Gakpo në fitoren 5-1 të Holandës ndaj Suedisë ishte goli i 100-të i turneut dhe erdhi në ndeshjen e 33-të të kompeticionit.
Vetëm Botërori i vitit 1954 në Zvicër e ka arritur këtë shifër më shpejt, duke i nevojitur vetëm 20 ndeshje.
Aktualisht, turneu që po zhvillohet në SHBA, Meksikë dhe Kanada po regjistron mesatarisht 3,09 gola për ndeshje dhe është në rrugën e duhur për të kaluar shifrën e 300 golave deri në fund.
Një nga arsyet që po diskutohet për numrin e lartë të golave është topi zyrtar i Adidas, “Trionda”.
Disa portierë kanë pasur vështirësi me trajektoren dhe shpejtësinë e tij, veçanërisht në goditjet nga distanca.
Kylian Mbappe, për shembull, shënoi nga rreth 30 metra kundër Senegalit, ndërsa disa gola të tjerë spektakolarë janë realizuar nga jashtë zonës.
Ish-portieri i Anglisë, Joe Hart, ka vënë re se topi duket se lëviz më shpejt dhe në mënyrë më të paparashikueshme se zakonisht.
Edhe Paul Robinson ka deklaruar se në disa raste sjellja e topit nuk ka qenë ajo që pritej, duke kujtuar polemikat që shkaktoi topi “Jabulani” gjatë Botërorit 2010 në Afrikën e Jugut.
Një tjetër faktor mund të jetë formati i ri me 48 skuadra. Katër kombëtare debutuese, Kepi i Gjelbër, Curacao, Jordania dhe Uzbekistani, po marrin pjesë për herë të parë në një Botëror.
Edhe pse disa prej tyre kanë treguar paraqitje të mira, diferenca në nivel me ekipet më të forta ka sjellë rezultate me shumë gola.
Gjermania, për shembull, fitoi 7-1 ndaj Curacaos, ndërsa Kanadaja mposhti Katarin me rezultatin e thellë 6-0.
Megjithatë, trajneri Thomas Frank thekson se, përveç disa ndeshjeve, shumica e skuadrave më të dobëta nuk janë dominuar plotësisht dhe kanë qenë konkurruese.
Temperaturat e larta në Amerikën e Veriut mund të kenë gjithashtu ndikim.
Rreth 29 për qind e golave të turneut janë shënuar pas minutës së 76-të, një tregues se lodhja fizike po luan rol të rëndësishëm në fazat përfundimtare të ndeshjeve.
Gabimet individuale dhe humbjet e topit janë shtuar, duke krijuar më shumë mundësi për gol.
Po ashtu, ndërprerjet e detyrueshme për hidratim po u japin trajnerëve mundësinë të bëjnë korrigjime taktike gjatë ndeshjes.
Këto pushime treminutëshe janë shndërruar në mini-mbledhje strategjike, ku trajnerët japin udhëzime të reja dhe organizojnë ndryshime që shpesh ndikojnë drejtpërdrejt në rrjedhën dhe rezultatin e takimeve. /Ad.Ab./
