Vijojnë me intensitet punimet për ndërtimin e Auto-Moto Parkut pranë lumit Shkumbin, një nga projektet më ambicioze infrastrukturore që po realizohet aktualisht në qytetin e Elbasanit.
Në zonën e rrugës “Gjergj Arianiti”, buzë lumit Shkumbin, puna në terren po ecën me ritme të shpejta, duke shënuar një tjetër hap të rëndësishëm drejt përfundimit të Auto-Moto Parkut të parë në Shqipëri. Ky projekt përfaqëson një prej investimeve më të mëdha dhe më komplekse të ndërmarra ndonjëherë në fushën e sporteve automobilistike dhe motoristike në vend.
Kryetari i Bashkisë Elbasan, Gledian Llatja, së bashku me deputetin Adi Qose, kanë inspektuar nga afër ecurinë e punimeve, duke vlerësuar rëndësinë që ky investim ka për zhvillimin urban dhe ekonomik të qytetit. Zona ku po ndërtohet parku pritet të shndërrohet në një pol të ri zhvillimi, me ndikim të drejtpërdrejtë në punësim dhe turizëm.
Projekti i Auto-Moto Parkut synon të krijojë një hapësirë moderne, ku natyra dhe inxhinieria bashkohen në mënyrë harmonike, duke ofruar kushte për organizimin e eventeve automobilistike dhe motoristike të përmasave ndërkombëtare.
Ky investim pritet të ndikojë ndjeshëm në pozicionimin e Elbasanit në hartën e shpejtësisë dhe turizmit elitar, duke rritur atraktivitetin turistik të zonës dhe duke e kthyer qytetin në një destinacion të ri për sportdashësit dhe vizitorët vendas e të huaj.
