Kryetari i grupit parlamentar Taulant Balla së bashku me deputetin Luan Duzha dhe Kryetarin e Bashkisë së Cerrikut Andis Salla asistuan operacionin humanitar që po zhvillohet në Cerrik. Aktualisht me fondet e Bashkisë së Cerrikut janë bërë gati të shpërndahen për familjet në nevojë 1200 pako.
Pjesa e parë e operacionit humanitar në këtë bashki u krye me ndihmën e organizatave dhe bizneseve, ndërsa do të vijojë puna, tha Balla, edhe më tej për t’ju gjendur çdo familje në nevojë, por edhe çdo të moshuari të vetmuar me shërbimet që ka nevojë.
Taulant Balla “Sot në qendrën e operacionit të ndihmës humanitare për familjet në nevojë në Bashkinë Cerrik janë gati 1200 pako të tjera, përveç atyre që janë shpërndarë deri tani. Këto pako ushqimore janë blerë sipas procedurave të përcaktuara nga Fondi i Emergjencave Civile të bashkisë Cerrik. Janë pako të plota ushqimore të cilat përmbajnë të gjitha produktet e domosdoshme për një familje. VKM ka përcaktuar qartë cilat janë familjet që përfitojnë. Ndërkohë në Cerrik edhe procesi i shpërndarjes së ndihmës ekonomike të dyfishuar ka përfunduar.”
Balla reagoi edhe ndaj atyre që, jo vetëm nuk po japin ndihmesën e tyre në këtë operacion të rëndësishëm, por edhe e përflasin atë:
Taulant Balla “Dua t’u them të gjithë atyre që këtë situatë lufte e shohin nga divani, se ky operacion humanitar, i cili u ka ardhur në ndihmë rreth 200 mijë familjeve në të gjithë Shqipërinë, është një detyrim që qeveria ka ndaj atyre që sot janë në nevojë. Ky operacion humanitar do të vijojë deri në fund të kësaj lufte”.
Kryetari i Bashkisë së Cerrikut informoi për punën e deritanishme ku të gjitha strukturat e bashkisë gjenden në terren për të asistuar çdo nevojë të qytetarëve:
Andis Salla Kryetar i Bashkisë Cërrik “Kemi trokitur derë më derë në rreth 1 mijë familje në nevojë duke ju gjendur pranë për nevojat që kanë. Sot kemi përgatitur rreth 1200 pako ushqimore me fonde të Bashkisë Cerrik. Deri tani, kemi shpërndarë 1 mijë pako ushqimore me ndihmën e bizneseve të zonës dhe donatorëve. U bëj thirrje qytetarëve të qëndrojnë në shtëpi.”
Edhe deputeti Luan Duzha vlerësoi punën e bërë nga Bashkia Cerrik, ku asnjë familje nuk ka mbetur pa marrë ndihmën ushqimore ndërkohë që operacioni vazhdon:
Luan Duzha “Falenderoj të gjithë stafin e bashkisë që i janë gjendur qytetarëve në këto ditë të vështira. Është hera e parë që zhvillohet një operacion i tillë dhe mbulohen të gjithë nevojat e qytetarëve.”
Elbasaninews.tv
