ATSH/ -Dezinfektimi i institucioneve publike dhe jo vetëm, është mjaft i rëndësishëm për të parandaluar përhapjen e koronavirusit COVID-19.
Për këtë arsye shumë bashki të vendit po dezinfektojnë institucionet publike në qytetet e tyre, por edhe ambientet publike.
Bashkia e Durrësit ka vijuar dezinfektimin e shkollave publike në kuadër të marrjes së masave parandaluese për parandalimin e përhapjes së koronavirusit.
“Vijon dezinfektimi në shkollat e Durrësit që janë të hapura për maturat shtetërore. Ndërkohë janë dezinfektuar të gjitha kopshtet dhe çerdhet e bashkisë së Durrësit të cilat hapen në 1 qershor”, thuhet në njoftimin e bashkisë Durrës, e cila ka publikuar foto nga procesi i dezinfektimit.
“Procesi i dezinfektimit në të gjitha institucionet arsimore dhe ato parashkollore do të vazhdojë sipas protokollit të Institutit të Shëndetit Publik i cili po zbatohet me rigorozitet”, bën të ditur bashkia e Durrësit.
