ATSH-ANSA/ – Ka një risi që pritet të ndryshojë mënyrën e udhëtimit me kafshët shtëpiake: mundësia për të marrë në kabinë qentë deri në 30 kg.Kompania Aeroitalia prezanton projektin e parë që lejon qentë deri në 30 kg të fluturojnë në kabinë pranë pronarit të tyre, pa transportues dhe në kushte të plota sigurie.
Një kthesë historike, një shenjë qytetarie në drejtim të barazimit të të drejtave të qenieve të ndjeshme si qentë, të cilët nuk do të trajtohen më si bagazhe në stivë.
Takimi i prezantimit, me titull “Qentë në kabinë pa transportues: gjithmonë pranë teje, kudo”, do të zhvillohet në Quattrozampeinfiera Napoli, të shtunën më 11 dhe të dielën më 12 prill.
Projektin do ta prezantojë doktoresha Rosalba Calabrese, përgjegjëse për Cabin Pet në Aeroitalia.
Gjatë eventit do të shfaqet videoja e fluturimit testues, e ndjekur nga rrëfimi i fluturimit të parë zyrtar. I pranishëm do të jetë edhe Evangelista, një Setter anglez 5-vjeçar, i cili ka marrë pjesë në fluturimin provë në kabinë.
Aeroitalia ka nisur në vitin 2026 një fazë testimi dhe procedura të reja për transportin e qenve deri në 30 kg në kabinë, duke u mundësuar atyre të udhëtojnë në siguri pranë pronarëve të tyre.
Një nismë e bërë e mundur edhe falë udhëzimeve të reja të ENAC, të miratuara nga Ministria e Transporteve, të cilat hapin rrugën për një model më të avancuar dhe gjithëpërfshirës të lëvizshmërisë për kafshët shtëpiake. /os/
