TIRANË, 15 qershor /ATSH – I. Vata/- Bashkia Bulqizë ka nisur verifikimin e pronave ku janë gjithsej 700 pasuri private dhe 300 shtetërore dhe përfitojnë 1500 banorë rezident.
Pas një pune përgatitore prej disa muajsh, Bashkia Bulqizë ka hapur zyrtarisht procesin e regjistrimit të pronave, duke nisur me Njësinë Administrative Shupenzë, konkretisht zona kadastrale ZK.3444 – Shupenzë.
“Ky proces, i ndërmarrë nga Bashki Bulqizë, do të trajtojë rreth 700 pasuri private, shtëpitë e vjetra tradicionale, objekte në proces legalizimi, prona të vjetra, objekte të privatizuara. Gjithashtu, procesi do të trajtojë edhe rreth 300 pasuri shtetërore, kryesisht prona të institucioneve publike, vepra infrastrukture, kullota, pyje. Prej tij do të përfitojnë rreth 1500 banorë, rezidentë apo të emigruar të këtyre zonave”, shprehet bashkia.
Bashkia Bulqizë, shton se “i gjithë procesi i regjistrimit do të kryhet nga studio fituese edhe do të monitorohet dhe ndihmohet nga ekipet tona pranë Njësisë Administrative Shupenzë. Kjo është një nismë e cila do t’i japë fund një kalvari të gjatë kërkesash të drejtuara nga banorët dhe një problemi që nuk ka gjetur zgjidhje prej shumë vitesh”.
Procesi do të vijojë më tej në të gjitha njësitë administrative të Bashkisë Bulqizë.
ATSH
