ATSH – I. Vata/ -Kryetari i Kuvendit, Gramoz Ruçi, priti sot në një takim, zëvendëskryeministrin e Republikës së Kosovës Besnik Tahiri.
Gjatë takimit u bisedua mbi çështje aktuale të zhvillimeve në Kosovë dhe në rajon.
Kryetari i Kuvendit, Ruçi vuri në dukje se “Shqipëria përshëndeti marrëveshjen ekonomike midis Kosovës dhe Serbisë, të firmosur në prezencën e Presidentit të ShBA Donald Trump”.
“Kjo marrëveshje i hap rrugën marrëveshjes përfundimtare dhe njohjes së ndërsjelltë. Natyrisht, marrëveshja e 4 shtatorit nuk është gjithçka do të dëshironim ne, shqiptarët. Por hapja e dosjes së Kosovës në tryezën e punës së Presidentit të ShBA është garanci e një procesi pa kthim prapa, deri në zgjidhjen përfundimtare të njohjes së Kosovës. Shqipëria mbështet gjithashtu dialogun Kosovë-Serbi, të ndërmjetësuar nga BE-ja. Rezultati përfundimtar duhet të jetë një marrëveshje e detyrueshme ligjore, që mundëson njohjen e ndërsjelltë mes dy vendeve, anëtarësimin e Kosovës në OKB dhe BE, si dhe trajtim të drejtë të minoriteteve, konform Kushtetutës”, theksoi Ruçi.
Nga ana e tij, zëvendëskryeministri Besnik Tahiri falënderoi kryetarin e Kuvendit, Gramoz Ruçi, për pritjen dhe mbështetjen që Shqipëria i jep Kosovës në këtë fazë shumë të rëndësishme të zhvillimeve. “Është shumë i dobishëm njësimi i qëndrimeve të të dy vende në planin diplomatik dhe arenën ndërkombëtare. Mbështetja edhe përvoja e Shqipërisë është shumë e dobishme edhe në punën e institucioneve dhe agjencive të Kosovës”, u shpreh Tahiri. /j.p/
